İranda bu il 423 nəfər edam edilib

İranda son üç gündə ən azı 11 bəluc edam edilib.
Reportyor.tv xəbər verir ki, bu barədə insan haqları qrupları bildiriblər.
Bununla da 2023-cü ildə İranda edam edilənlərin sayı 423-ə çatıb.Bəluc azlığına aid məsələlərlə bağlı hesabat yayan “Haalvsh” hüquq müdafiə qrupu bildirib ki, edamlar Sistan-Bəlucistanda və Bircənd şəhərində bir neçə həbsxanada həyata keçirilib. Hesabatda bildirilib ki, narkotiklə bağlı ittihamlara görə ölüm cəzasına məhkum edilmiş məhbusların heç biri ailələri ilə son görüşünü keçirməyib. Ailələr yalnız yaxınlarının cənazələrini götürməyə çağırılıb.
Norveçdə yerləşən İran İnsan Haqları Təşkilatının (IHRNGO) məlumatına görə, 2023-cü ilin əvvəlindən indiyədək 423 nəfər, o cümlədən 10 qadın edam edilib.
ABŞ-da yerləşən İranda İnsan Haqları Fəallarının (HRANA) iyul ayında yaydığı hesabatda bildirilib ki, İranda son 10 ildə təxminən 5000 nəfər edam edilib. HRANA-nın hesabatına görə, 2022-ci ildə edamların sayı bir il əvvəlki ilə müqayisədə 88 faizdən çox artıb. Rəsmi olaraq bildirilməmiş bir çox edam hallarının daha çox olduğu qeyd olunur.