Şəmkirdə 14 yaşlı qızın nikaha daxil olması ilə bağlı araşdırma başladıldı - YENİLƏNDİ

Şəmkir rayonunda növbəti yetkinlik yaşına çatmayan şəxsin nikaha daxil olması barədə sosial şəbəkələrdə yayılan məlumatlarla bağlı rayon Polis Şöbəsində müvafiq araşdırmalar başlanılıb.
Bu barədə Reportyor.tv Daxili İşlər Nazirliyinin Mətbuat Xidmətinin Gəncə regional qrupunun baş inspektoru, polis kapitanı Eşqin Qasımov bildirib.
Belə ki, 11-ci sinif şagirdi Ləman Mehtiyevanın (ad-soyad şərtidir) nişan mərasimi keçirilməsi barədə məlumata görə, artıq həm qızın, həm də qarşı tərəfin valideynləri şöbəyə dəvət olunaraq profilaktiki söhbət aparılıb, bildirilib ki, yetkinlik yaşına çatmayan şəxsin ailə qurması cinayət məsuliyyəti yaradır və bu məsuliyyəti valideynlər daşıyır.
xxx
14:15
Sosial şəbəkələrdə Şəmkirdə 14 yaşlı qızın nişanlanması barədə məlumatlar yayılıb.
Yayılan məlumatlara görə, 14 yaşlı qız ailəsinin razılığı ilə 26 yaşlı əmisi oğlu ilə nişanlanıb.
Publika.az xəbər verir ki, məsələ ilə bağlı DİN-in Mətbuat xidmətinin Gəncə regional qrupunun inspektoru Eşqin Qasımov bildirib ki, yayılan məlumatlarla bağlı araşdırmalara başlanılıb: “Şəmkir rayon Polis Şöbəsinin əməkdaşları rayonda nişan mərasimi olduğu bildirilən yeniyetmə qızın evində olublar. Qızın ailəsi hələlik elçilik mərasimi keçirildiyini, yaxında isə nişan olacağını deyib. Yeniyetmənin valideynləri isə toy mərasiminin qanunun tələbinə uyğun olaraq qızlarının 18 yaşı tamam olduqdan sonra keçiriləcəyini bildiriblər. Qızın və oğlanın valideynləri Polis Şöbəsinə dəvət olunub, onlarla profilaktik söhbət aparılacaq”.