Rusiya-Ukrayna danışıqlarına kölgə salan məqam - Ərdoğan açıqladı

"Ukraynada mülki şəxslərə hücumlar Ankaranın vasitəçiliyi ilə Moskva ilə Kiyev arasında aparılan danışıqların uğurlu gedişini ləngitdi".
Qaynarinfo "Anadolu” agentliyinə istinadən xəbər verir ki, bunu Türkiyə Prezidenti Rəcəb Tayyib Ərdoğan deyib.
"Tərəflər danışıqlarda nəzərəçarpacaq irəliləyiş əldə etmişdi. Lakin Buça və İrpinin görüntüləri, Kramatorsk mülki şəxslərinin hədəf kimi istifadə edilməsi bizim səylərimizə kölgə salır”, deyə Ərdoğan təəssüflə bildirib.
Prezident qeyd edib ki, Türkiyə Ukraynada həbi əməliyyatların dayandırılması və Moskva ilə Kiyev arasında davamlı sülhün əldə olunması üçün bütün lazımi səyləri davam etdirəcək:
"İki qonşumuz arasında atəşkəsə, daha sonra isə davamlı sülhə nail olmaq insanlıq naminə görülən ən yaxşı işlərdən biri olacaq. Bu müharibədə qalib olmayacaq, çünki bütün bəşəriyyət uduzur. Əslində, münaqişələr davam etdikcə həm insan itkiləri, həm də iqtisadi xərclər artır. Dünyamız böyük qeyri-müəyyənliyə doğru sürüklənir".
Dövlət başçısı əmin edib ki, Türkiyə İstanbulda Rusiya-Ukrayna danışıqlarının "tərəfləri və beynəlxalq ictimaiyyəti qane edən” nəticəyə nail olmağa çalışacaq.
Ərdoğan Ukrayna böhranının dialoq yolu ilə, Ukraynanın ərazi bütövlüyü və suverenliyinin qorunması əsasında sülh yolu ilə həllinin mümkün olacağına əminliyini ifadə edib.