İngiltərənin baş həkimi koronavirusun ölüm faktorlarını açıqladı

"Qocalıq, müşayiət olunan xəstəliklər və kişi cinsinə aidiyyət amilləri koronavirusa yoluxma və daha sonra bu infeksiyadan ölmə ehtimalını artırır".

“Report” xəbər verir ki, bunu İngiltərənin baş həkimi Kris Uittli deyib.

K.Uittlinin sözlərinə görə, koronavirusa əsasən yaşlı insanlar yoluxur. Bu səbəbdən onları zəruri təcridetmə ilə təmin etmək lazımdır.

O, qeyd edib ki, risk zonasına həmçinin “müşayiətçi” xəstəliyi, misal üçün, ürək-damar sistemində problemi olanlar şamil edilir.

“Səbəbi heç də aydın olmasa da, kişi cinsinə mənsubolma da risk faktorudur”, - Uittli əlavə edib.

Xatırladaq ki, koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus 210 ölkə və bölgədə qeydə alınıb.

Dünyada koronavirus infeksiyasına indiyədək yoluxanların sayı 2 306 000-i ötüb. Bunların 588 804 nəfəri sağalıb, 158 063 nəfəri isə ölüb.

Ümumdünya Səhiyyə Təşkilatı (ÜST) fevralın 11-də infeksiyanın adını COVID-19 qoyub, martın 11-də isə koronavirusu pandemiya elan edib.