loading...

BAKIDAKI UŞAQ ƏYLƏNCƏ MƏRKƏZLƏRİNDƏKİ QİYMƏT ''OD TUTUB YANIR ''ÇARƏSİZ AZƏRBAYCAN VALİDEYİNİ ....

Natiq Cəfərli: “Bu, hər hansı bir dövlət orqanının müdaxiləsi ilə həll olunacaq məsələ deyil, rəqabət mühiti olmalıdır...”

Yay fəslində əksəriyyət Azərbaycanın müxtəlif bölgələrinə, xaricə istirahətə gedir. Təbii ki, istirahətə gedə bilmək üçün gərək cibiniz dolu olsun. Müəyyən bir qisim də var ki, onlar elə yay istirahətini də paytaxtda keçirməli olur. Bu zaman uşaqlarını əyləndirmək üçün yeganə məkan uşaq əyləncə mərkəzləri və parklar olur. Ancaq burada da hər dəqiqəniz pula hesablanır.

Bu cür əyləncə mərkəzlərini “uşaq soyğunçuluq mərkəzləri” adlandırmaq da olar. Qiymətlərlə daha yaxından tanış olmaq üçün bir neçə uşaq əyləncə mərkəzlərinə və parklara baş çəkdik. Əyləncə mərkəzləri uşaqları güldürsə də valideynləri “ağladırdı”. Gördüyümüz mənzərələr ürəkağrıdıcı idi. Belə ki, pulu bitən valideyn uşağının digər attraksiona minməsinə mane olmağa çalışır, uşaq isə göz yaşı tökür. Bu vəziyyətdə o valideynin üzündəki çarəsiz, üzgün ifadə, attraksion sahibinin isə uşağın göz yaşı hesabına pul qazanacaq deyə parlayan gözləri təsirli bir mənzərə yaradırdı.

İlk baş çəkdiyimiz məkan bulvar ərazisi oldu. Burada karusellərin qiyməti 3 dəqiqəsi 1 manatdan başlayır. Belə ki, “Günəş” adlandırılan karusel 3 dəqiqəsi 1 manat, viking 3 dəqiqəsi 2 manat, qorxulu ev 5 manat, topların içərisində oynamaq 5 dəqiqəsi 1 manat, uşaqlar üçün tullanmaq attraksionun 5 dəqiqəsi 4 manat idi.

Uşaqlarını bulvara gətirən valideynlər bəzi attraksionların qiymətinin baha olmasından gileylənirdi. Ayşən Quliyeva deyir ki, iki uşağı iki attraksiona mindirəndə artıq 5 manat getmiş olur: “Bəzi attraksionlar 2 manatdır. Hələ burada satılan tum, dondurma, partlamış qarğıdalı və suların qiymətini demirəm. Onları evin yanındakı mağazadan ucuz alıb hazırlıqlı gəlirik”.

Təbii ki, uşaq əyləncə mərkəzləri ilə müqayisədə buradakı qiymətləri nisbətən ucuz adlandırmaq olardı. Əyləncə mərkəzlərində əsasən kart sistemidir. Kartına 20 manat vurursan, amma heç 20 dəqiqə əylənə bilmirsən. Attraksion və əyləncəli oyunların dəqiqəsini və pulunu hesabladıqda bir uşağın normal 1-2 saat əylənməsi üçün gərək 100 manatınızdan keçəsiniz. Bulvardan sonra yolumuzu “Megafun” əyləncə mərkəzindən saldıq. Burada həm nağd ödənişlə, həm də kartla olan oyunlar vardı. Həftə sonu olmasına baxmayaraq burada da əvvəlki kimi çoxluq gözə dəymirdi. Ancaq içəri girər-girməz səs-küy insanın burada bir saatdan artıq qalmasına imkan vermir. Adı əyləncə mərkəzi olsa da, burada insanlara “səs terroru” edilir. İçəri doğru irəlilədikcə, səsi bir-birinə qarışan əcnəbi dillərdəki mahnılardan qulaq tutulur. Burada uşaq üçün olan oyunların qiyməti 50 qəpik və 6 manat arasında dəyişir. Amma böyüklərin əylənməsi üçün qiymətlər olduqca baha idi. Məsələn, karaokedə sizin ürəyinizdən özünüzü bir anlıq müğənni hesab edib mahnı oxumaq keçirsə, bunun 30 dəqiqəsinə 10 manat ödəməlisiniz. Boulinq oynamaq isə 6 manatdır. Burada 25 manatlıq kart da alıb əylənə bilərsiniz. Ancaq bir kartdan iki uşaq istifadə edəcəksə, biri əylənən zamanı digəri durub baxmalı, onun əyləncəsinin bitməsini gözləməlidir. İki uşağın bir kartdan istifadə edib eyni anda bir attraksiona minmək haqqı yoxdur. Burada buz üzərində sürüşmək, qorxulu tunel kimi əyləncə növləri də var ki, onların da qiyməti bahadır. Burada satılan suların, qarğıdalının qiymətləri də bahadır. Uşağınız üçün bu qidaları almaq istəyirsinizsə, özünüzlə əlavə 15-20 manat pul götürməlisiniz. Buradakı kafelərin hər birində 5-6 nəfər gözə dəyirdi. Az adam olmasının səbəbi isə əlbəttə ki, yenə də bahalıq idi.

“Megafun”da çay içmək istəsəniz, bu, sizə 20 manata, meyvə şirəsi içmək 5-10 manata, dondurma yemək 10 manata, sandiviç 5-10 manata, pizza 10-16 manata başa gələcək.

“Megafun”dan ayrılıb yolumuzu nisbətən ucuz olacağını düşündüyümüz “Metropark”dan saldıq. Buradakı attraksionlardan, oyunlardan istifadə edə bilmək üçünsə kart almaq vacibdir. Burada 3 manat verib kart almalı, sonra isə ona istədiyiniz məbləğdə balans yükləməlisiniz. Buradakı attraksionlar əsasən kiçik yaşlı uşaqlar üçün nəzərdə tutulub, 3 dəqiqə əylənmək 1-3 manat arasında başa gəlir.

Uşağını “Metropark”a əyləndirməyə gətirən Anar Əliyev deyir ki, karta 50 manat yükləsə də uşaqlar əylənməkdən doymur: “Oyunların, attraksionların müddətini az edirlər. 3 dəqiqəyə uşaq ancaq anlaya bilər ki, nəsə fərqli bir şeyə minib. Həm də axı uşaq 3 dəqiqə ilə kifayətlənmir. Bir attraksionda heç olmasa 10 dəqiqə qalmaq istəyir. Ona görə də 50 manat balans yüklədim, o da artıq yekunlaşmaq üzrədir. Heç olmasa insafa gəlib bu dəqiqələri 5 dəqiqə etsinlər. Hər yerdə belədir. Axı bu düzgün deyil. Uşaqlardan istifadə edib bizi soyurlar”.

Apardığımız müşahidə Azərbaycanda orta gəlirli bir ailənin gəlirinin 1 uşağı hər gün bir saat normal əyləndirməyə imkan vermədiyini deməyə əsas verir. İşləməyən analara verilən aylıq uşaq pulu isə nəinki onların əyləncəsinə, heç geyiminə belə yetmir.

Maraqlıdır, uşaqların əylənməsi üçün qiymətlər əslində necə tənzimlənməlidir?

İqtisadçı ekspert Natiq Cəfərli rəqabət mühiti olmadığı üçün qiymətlərin bu cür baha olduğunu dedi: “Qiymətlərin tənzimlənməsi nə dövlət, nə hökumət, nə də Bakı Şəhər İcra Hakimiyyəti tərəfindən həyata keçirilməməlidir. Normalda rəqabətli mühit olmalıdır. Məsələn, elə bulvar ərazisində bir nəfərə və yaxud da bir şirkətə məxsus əyləncə mərkəzləri olmaqdansa, bir neçə rəqabətli əyləncə mərkəzləri olsaydı, o zaman qiymət siyasəti həyata keçirilərdi.

Yaxud da şəhərdə barmaqla sayılacaq qədər uşaq əyləncə mərkəzləri var. Normal şərait olsaydı və böyük biznesmenlər, xarici investorlar maraq göstərib bir neçə uşaq əyləncə mərkəzləri açsaydı, o zaman qiymətin tənzimlənməsi mümkün olardı. Əslində bu məsələ qanunla, hər hansısa bir dövlət orqanının müdaxiləsi ilə həll olunacaq bir məsələ deyil.

Sadəcə olaraq, Azərbaycanda orta gəlirlilik - təqaüdlərin, maaşların, uşaqlara verilən müavinətlərin miqdarı o qədər aşağıdır ki, bu, normal yaşamağa çatmır. Söhbət tək əyləncədən getmir; uşaq yeməklərinin, geyimlərinin də qiyməti çox bahadır. Amma sırf əyləncədən və əyləncə mərkəzlərindən söhbət gedirsə, bunun yolu hər hansısa bir müdaxilə deyil.

Əgər biz bazar iqtisadiyyatının qaydalarına uyğun iqtisadi model qurmaq istəyiriksə, burada müdaxilə olması mümkün deyil. Sadəcə olaraq, rəqabətli mühit artmalıdır. İnsanların daha çox seçim imkanı olmalıdır ki, qiymətlərə də tez təsir göstərsin və qiymətlər aşağı düşsün. Dövlətin əlində ola bilən vasitə ondan ibarətdir ki, insanların yaşayış səviyyəsini yüksəltsin, maaşları, təqaüdləri artırmağın yollarını tapsın ki, insanlar da əldə etdikləri vəsaitlə həm uşaqlarına baxa bilsinlər, həm də onları əyləndirməyə imkanları olsun”.
BAKIDAKI  UŞAQ ƏYLƏNCƏ  MƏRKƏZLƏRİNDƏKİ  QİYMƏT  ''OD TUTUB YANIR ''ÇARƏSİZ AZƏRBAYCAN VALİDEYİNİ ....
Dosye.org
Бесплатные шаблоны для 10.5Forex Портал для чайников


Paylaş:   

Oxşar olan digər xəbərlər