Qazi atası icra başçısından NARAZILIQ ETDİ - "...heç qəbul etməyiblər"

Vətən müharibəsində böyük rəşadət göstərib.
Elə öz doğma rayonu uğrunda gedən döyüşlərdə, oktyabrın 20-də ağır yanıq xəsarəti alaraq yaralanıb.
Atası Famiq Quliyevin Reportyor.info-ya bildirdiyinə görə, oğlu əvvəlcə Saatlıya yerləşdirilib, sonra Mərkəzi Hospitala gətirilib:
“Amma düzgün müalicə getmədiyi üçün sağalmayıb. İndi Azərbaycan Tibb Universitetinin Cərrahiyə korpusunda müalicəsi gedir.



Narazı deyilik, baxılır. Amma onun xaricdə müalicəsi lazımdır. Bizə də deyirlər ki, xaricə səfər yoxdur, olanda göndərəcəyik”.
Qazi atası bildirir ki, oğlu günü-gündən pisləşir: “Nən ikinci oğlumu da vətənə xidmətə göndərmişəm. İndi istəyirəm ki, Şahinin müalicəsi xaricdə davam etdirilsin.
İki ay qabaq Yaşat Fonduna da müraciət etmişəm. Deyirlər ki, gediş yoxdur. Şahin iki dəfə bağırsaq əməliyyatı keçirib. Uşağın vəziyyəti getdikcə pisləşir”.
F.Quliyev deyir ki, Füzuli Rayon İcra Hakimiyyətinə də müraciət olunub: “Amma maraqlanmayıblar. Şahinin anası qəbula gedib, heç qəbul etməyiblər”.



Qazi atası I Vitse-prezident Mehriban Əliyevadan kömək istəyir: “Mən Mehriban xanıma güvənirəm. Həkimlərin rəyinə əsasən müalicəsini artıq Azərbaycanda deyil, Türkiyədə davam etdirməlidir.
Ancaq müalicənin Türkiyədə davam etdirilməsi üçün təcili şəkildə aidiyyatı qurumlar kömək etməlidirlər. Əgər Şahin burda qalsa üçüncü dəfə əməliyyata girməli olacaq. O da həyatı üçün çox risklidir”.

Qeyd edək ki, Füzuli rayonunun düşməndə olan yüksəkliklərini ələ keçirən zaman Şahinin sürdüyü tank düşmən tərəfindən vurulur, tankın vurulması nəticəsində Şahin ağır dərəcəli yanıq xəsarətləriylə birinci Saatlı rayon xəstəxanasına, daha sonra isə Müdafiə Nazirliyinin Mərkəzi Hərbi Hospitalına aparılır.
Şahin döyüşə çağrılmamışdan əvvəl elə Hərbi Hospitalda mədə-bağırsaq xəstəliyi ilə bağlı müalicə alırdı.
Müalicəsi bir neçə aya yaxındır davam edir və bu müddətdə iki dəfə əməliyyat olunmasına baxmayaraq Şahinin hazırkı vəziyyəti çox kritikdir.